امریکی قانون کےبرخلاف صدر ٹرمپ کی تصویر ڈالر پر چھاپنے کی تیاریاں

واشنگٹن میں صدر ڈونلڈ ٹرمپ کی تصویر والے ڈھائی سو ڈالر کے نئے کرنسی نوٹ کی تیاری سے متعلق اہم پیش رفت سامنے آئی ہے جبکہ اس مقصد کے لیے امریکی قانون میں تبدیلی کی کوششیں بھی تیز کردی گئی ہیں۔

غیر ملکی میڈیا رپورٹس کے مطابق امریکی محکمہ خزانہ اور متعلقہ اداروں نے ڈھائی سو ڈالر کے یادگاری نوٹ کی تیاری کے لیے ابتدائی منصوبہ بندی مکمل کرلی ہے۔ امریکی وزیر خزانہ اسکاٹ بیسنٹ نے بھی اس حوالے سے تصدیق کی ہے کہ اگر کانگریس قانون منظور کرتی ہے تو محکمہ خزانہ اس پر عمل درآمد کرے گا۔

رپورٹ کے مطابق یہ خصوصی نوٹ امریکا کی آزادی کے ڈھائی سو سال مکمل ہونے کی تقریبات کے موقع پر جاری کیے جانے کی تجویز ہے۔ اگر یہ منصوبہ منظور ہوگیا تو ایک صدی سے زائد عرصے بعد پہلی مرتبہ کسی زندہ شخصیت کی تصویر امریکی کرنسی نوٹ پر شائع ہوگی۔

امریکی قانون کے تحت کسی زندہ شخص کی تصویر کرنسی پر چھاپنے کی اجازت نہیں، تاہم صدر ٹرمپ کے حامی قانون سازوں نے اس پابندی کے خاتمے کے لیے امریکی پارلیمنٹ میں بل پیش کردیا ہے۔

ذرائع کے مطابق امریکی کرنسی تیار کرنے والے ادارے نے ممکنہ ڈیزائنز پر کام شروع کردیا ہے جبکہ نئے نوٹ پر صدر ٹرمپ کے دستخط شامل کیے جانے کی تجویز بھی زیر غور ہے۔

رپورٹ میں کہا گیا ہے کہ ٹرمپ انتظامیہ کی جانب سے قومی علامتوں اور سرکاری اداروں میں صدر کی شناخت کو نمایاں کرنے کے اقدامات بھی جاری ہیں۔ مختلف وفاقی عمارتوں پر ٹرمپ کی تصاویر والے بینرز آویزاں کیے جاچکے ہیں جبکہ ٹرمپ کی تصویر والا یادگاری سونے کا سکہ اور خصوصی پاسپورٹ جاری کرنے کی تیاریاں بھی آخری مراحل میں داخل ہوچکی ہیں۔

دوسری جانب اپوزیشن جماعتوں اور ناقدین نے ان اقدامات پر شدید اعتراض کرتے ہوئے انہیں آمرانہ طرز عمل قرار دیا ہے۔ امریکی سینیٹر مارک وارنر نے کہا کہ عوام مہنگائی اور بڑھتے اخراجات سے پریشان ہیں جبکہ حکومت کی توجہ علامتی اقدامات پر مرکوز ہے۔

امریکی ذرائع ابلاغ کے مطابق نئے کرنسی نوٹوں کی تیاری میں کئی وفاقی ادارے شامل ہوتے ہیں اور ان کے ڈیزائن کو سکیورٹی وجوہات کی بنیاد پر طویل عرصے تک خفیہ رکھا جاتا ہے۔