اسحاق ڈار اور مارکو روبیو کی واشنگٹن میں ملاقات، پاک امریکا تعاون مزید مضبوط بنانے پر اتفاق

واشنگٹن میں نائب وزیراعظم و وزیر خارجہ اسحاق ڈار اور امریکی وزیر خارجہ مارکو روبیو کے درمیان دوطرفہ ملاقات ہوئی جس میں دونوں ممالک کے تعلقات اور علاقائی امور پر تبادلہ خیال کیا گیا۔

ترجمان دفتر خارجہ کے مطابق ملاقات میں پاک امریکا تعلقات میں ہونے والی مثبت پیش رفت پر دونوں فریقوں نے اطمینان کا اظہار کیا۔

مذاکرات کے دوران خطے اور عالمی سطح پر بدلتی ہوئی صورتحال پر بھی تفصیلی گفتگو ہوئی اور باہمی تعاون کے مختلف پہلوؤں کا جائزہ لیا گیا۔

امریکی وزیر خارجہ مارکو روبیو نے پاکستان کی امن و استحکام کے لیے کی جانے والی سفارتی اور ثالثی کوششوں کو سراہا۔

دونوں فریقوں نے تجارت، سرمایہ کاری، سلامتی اور انسداد دہشت گردی سمیت تمام شعبوں میں تعاون کو مزید فروغ دینے پر اتفاق کیا۔

اس کے علاوہ اعلیٰ سطح روابط کے فروغ اور علاقائی امن و خوشحالی کے لیے مشترکہ مفادات کی بنیاد پر پاک امریکا شراکت داری کو مزید آگے بڑھانے پر بھی اتفاق کیا گیا۔