راولپنڈی: پاکستان اور آسٹریلیا آج پہلے ون ڈے میں آمنے سامنے

پاکستان اور آسٹریلیا کی کرکٹ ٹیمیں آج پہلے ایک روزہ بین الاقوامی میچ میں راولپنڈی میں مدمقابل ہوں گی، دونوں ٹیموں نے میچ سے قبل بھرپور تیاریوں کا اظہار کیا ہے۔

راولپنڈی کرکٹ اسٹیڈیم میں کھیلے جانے والے اس اہم میچ کے لیے تمام انتظامات مکمل کر لیے گئے ہیں جبکہ دونوں کپتانوں نے ٹرافی کی رونمائی کی تقریب میں شرکت بھی کی۔

پاکستانی ٹیم کے کپتان شاہین آفریدی اور آسٹریلوی کپتان جوش انگلس نے مشترکہ طور پر ٹرافی کی رونمائی کی۔ اس موقع پر دونوں ٹیموں نے بھرپور پریکٹس سیشن میں حصہ لیا۔

قومی ٹیم کے بیٹرز نے نیٹس میں پہلے فاسٹ بولرز اور پھر اسپنرز کے خلاف بیٹنگ کی مشقیں کیں، جبکہ ہیڈ کوچ مائیک ہیسن کھلاڑیوں کو اہم ہدایات دیتے نظر آئے۔

میچ کے لیے پچ کو بھی حتمی شکل دے دی گئی ہے۔ ٹاس شام چار بجے ہوگا جبکہ مقابلہ شام ساڑھے چار بجے شروع ہوگا۔

پری میچ پریس کانفرنس میں شاہین آفریدی نے کہا کہ ہر کھلاڑی کو اپنی کارکردگی بہتر بنانے کی ضرورت ہے اور نوجوان کھلاڑیوں کو مواقع دینا ٹیم کے لیے اہم ہے۔

آسٹریلوی کپتان جوش انگلس نے کہا کہ پاکستان ایک مضبوط ٹیم ہے اور انہیں کسی صورت آسان حریف نہیں سمجھا جا سکتا۔