معروف شاعر بشیر بدر 91برس کی عمر میں بھوپال میں انتقال کر گئے

معروف اردو شاعر بشیر بدر طویل علالت کے بعد 91 برس کی عمر میں انتقال کر گئے، ان کے انتقال کی خبر کے بعد ادبی حلقوں میں گہرے رنج و غم کی فضا چھا گئی ہے۔

بھارتی میڈیا رپورٹس کے مطابق بشیر بدر گزشتہ کئی برس سے دماغی عارضے میں مبتلا تھے اور تقریباً ایک دہائی سے صاحب فراش تھے۔ وہ بھارتی شہر بھوپال میں انتقال کر گئے۔

بشیر بدر جدید اردو غزل کے اہم اور مقبول شاعر مانے جاتے تھے جنہوں نے اپنی شاعری میں محبت، تنہائی، ہجرت اور انسانی جذبات کو نہایت سادہ اور دلکش انداز میں پیش کیا۔

ان کی شاعری عام قاری سے لے کر ادبی حلقوں تک یکساں مقبول رہی اور ان کے کئی اشعار زبان زد عام ہیں۔ وہ اپنی منفرد اسلوب اور سادہ بیان کی وجہ سے اردو ادب میں نمایاں مقام رکھتے تھے۔

بھارتی حکومت نے انہیں ان کی ادبی خدمات کے اعتراف میں پدم شری ایوارڈ سے بھی نوازا تھا۔

ان کے انتقال کے بعد دنیا بھر میں اردو ادب سے وابستہ افراد نے افسوس کا اظہار کیا ہے اور انہیں جدید غزل کا ایک روشن باب قرار دیا جا رہا ہے۔