نائب وزیراعظم اور وزیر خارجہ اسحاق ڈار واشنگٹن پہنچ گئے

واشنگٹن: نائب وزیراعظم اور وزیر خارجہ سینیٹر اسحاق ڈار اپنے طے شدہ سرکاری دورے پر امریکا کے دارالحکومت واشنگٹن پہنچ گئے ہیں، جہاں وہ پاک امریکہ دوطرفہ تعلقات کے حوالے سے اہم ترین ملاقاتیں کریں گے۔

واشنگٹن پہنچنے پر امریکہ میں پاکستان کے سفیر رضوان سعید شیخ اور دیگر اعلیٰ سفارتی حکام نے نائب وزیراعظم کا پرتپاک استقبال کیا۔ اپنے اس مختصر اور انتہائی اہم دورے کے دوران اسحاق ڈار آج ہی امریکی وزیرِ خارجہ مارکو روبیو سے ملاقات کریں گے۔ اس اہم بیٹھک میں پاکستان اور امریکہ کے دو طرفہ تعلقات، تجارتی و اقتصادی تعاون اور اہم علاقائی و عالمی امور پر تفصیلی تبادلۂ خیال کیا جائے گا۔ دونوں ممالک کے مابین حالیہ دنوں میں اعلیٰ سطح کے رابطوں کا یہ سلسلہ تیزی سے آگے بڑھ رہا ہے۔

واشنگٹن آمد سے قبل نائب وزیرِ اعظم و وزیرِ خارجہ اسحاق ڈار نے نیویارک میں چین کے وزیرِ خارجہ وانگ ای سے بھی ایک اہم ملاقات کی تھی۔

چینی ہم منصب کے ساتھ ہونے والی اس ملاقات میں دونوں رہنماؤں نے خطے میں پائیدار امن کے قیام، کثیر الجہتی نظام (Multilateralism) کی مضبوطی اور قواعد پر مبنی عالمی نظام کے فروغ کے لیے مل کر کام کرنے کے عزم کا اظہار کیا تھا۔

ذرائع کے مطابق نائب وزیراعظم اور وزیر خارجہ اسحاق ڈار واشنگٹن میں اپنی تمام تر سرکاری مصروفیات اور اہم ملاقاتیں مکمل کرنے کے بعد آج ہی وطن واپسی کے لیے اسلام آباد روانہ ہو جائیں گے۔