خیبرپختونخوا؛ ڈاکٹروں کو دوائی کے نام کے بجائے فارمولہ لکھنے، کمپیوٹرائز نسخے کیلئے قانون سازی پرغور

خیبرپختونخوا حکومت نے ڈاکٹروں کی جانب سے ادویات کے تجارتی (برانڈ) ناموں کے بجائے محض ان کے فارمولے تحریر کرنے اور نسخہ جات کو کمپیوٹرائزڈ بنانے کے لیے وفاقی حکومت سے رابطہ کرنے کا فیصلہ کیا ہے۔ اس اقدام کا بنیادی مقصد مریضوں کے معاشی استحصال کو روکنا اور فارماسیوٹیکل کمپنیوں کے اثر و رسوخ کو ختم کرنا ہے۔یہ پیش رفت خیبرپختونخوا اسمبلی میں پاکستان پیپلز پارٹی (PPP) کی خاتون رکنِ صوبائی اسمبلی مہر سلطانہ کی جانب سے پیش کیے گئے توجه دلاؤ نوٹس پر سامنے آئی۔ انہوں نے ایوان میں موقف اپنایا کہ ملک میں فی الوقت کوئی ایسا جامع اور مؤثر قانون موجود نہیں جو معالجین کو پابند کر سکے کہ وہ برانڈ نام کے بجائے دوا کا جینیٹک (Generic) نام یا بنیادی فارمولہ لکھیں۔ انہوں نے نشاندہی کی کہ ہاتھ سے تحریر کردہ نسخے پڑھنے میں دشواری اور برانڈز کی اجارہ داری کے باعث عوام کو مہنگی ادویات خریدنا پڑتی ہیں، جبکہ فارمولہ تحریر کرنے اور کمپیوٹرائزڈ نسخہ جات سے سستی اور معیاری ادویات کی رسائی ممکن ہو سکے گی۔