اسلام آباد: ایمان مزاری اور ہادی علی چٹھہ کے خلاف متنازعہ ٹویٹس کیس کی سماعت

ڈسٹرکٹ اینڈ سیشن کورٹس اسلام آباد میں ایمان مزاری اور ہادی علی چٹھہ کے خلاف متنازعہ ٹویٹس سے متعلق مقدمے کی سماعت ہوئی، جس میں ڈی جی آئی ایس پی آر میجر جنرل احمد شریف چوہدری کو بطور گواہ عدالت طلب کرنے کی درخواست پر تفصیلی دلائل دیے گئے۔ سماعت جج افضل مجوکا نے کی۔

دورانِ سماعت ہادی علی چٹھہ نے مؤقف اختیار کیا کہ چھ جنوری کو ڈی جی آئی ایس پی آر نے پریس کانفرنس میں ملزمہ ایمان مزاری کا ٹوئٹر ہینڈل میڈیا پر دکھایا اور یہ تاثر دیا گیا کہ وہ دہشت گردوں کی تشہیر اور حمایت کرتی ہیں، لہٰذا ڈی جی آئی ایس پی آر اس کیس میں اہم گواہ ہیں اور انہیں عدالت بلایا جانا چاہیے۔ ان کا کہنا تھا کہ چونکہ ڈی جی آئی ایس پی آر بطور ترجمانِ افواجِ پاکستان بات کرتے ہیں، اس لیے وہ عام شخص نہیں اور ان کے بیان کا کیس پر اثر پڑتا ہے۔

ایمان مزاری نے بھی عدالت میں ڈی جی آئی ایس پی آر کی پریس کانفرنس کا مخصوص حصہ چلا کر دکھایا اور کہا کہ ان کی ٹویٹ پریس کانفرنس میں دکھائی گئی اور انہیں دہشت گردوں کا حامی قرار دیا گیا، اس لیے ڈی جی آئی ایس پی آر کو پریس کانفرنس کے بجائے عدالت میں آکر اپنا بیان ریکارڈ کروانا چاہیے۔

اس موقع پر جج افضل مجوکا نے ریمارکس دیے کہ “کیا جو بھی اس کیس کے بارے میں بات کرے گا، عدالت اسے طلب کر لے گی؟” عدالت نے واضح کیا کہ پراسیکیوشن کو مجبور نہیں کیا جا سکتا کہ وہ کسی مخصوص شخص کو بطور گواہ پیش کرے یا نہ کرے۔

پراسیکیوٹر نے ڈی جی آئی ایس پی آر کو عدالت بلانے کی درخواست کی سخت مخالفت کرتے ہوئے مؤقف اپنایا کہ پریس کانفرنس میں کہیں بھی ایمان مزاری کا نام نہیں لیا گیا اور ڈی جی آئی ایس پی آر کو اس کیس میں طلب نہیں کیا جا سکتا۔

بعد ازاں عدالت نے فیصلہ محفوظ کرتے ہوئے قرار دیا کہ گواہان کو طلب کرنے کا مرحلہ ملزمان کے دفعہ 342 کے بیانات کے وقت آئے گا۔ عدالت کے مطابق 342 کے بیان کے وقت ہی یہ دیکھا جائے گا کہ ڈی جی آئی ایس پی آر کو بطور گواہ بلانے کی درخواست متعلقہ اور قابلِ سماعت ہے یا نہیں، تب تک یہ درخواست زیرِ التوا رہے گی۔

عدالت نے کیس کی مزید سماعت کل تک ملتوی کر دی، جبکہ آئندہ سماعت پر ایمان مزاری کی جانب سے گواہ شہروز ریاض پر جرح کی جائے گی۔