صدر آصف زرداری سے محسن نقوی کی ملاقات، امن و امان کی صورتحال پر تبادلہ خیال

صدرِ مملکت آصف علی زرداری سے وفاقی وزیرِ داخلہ محسن نقوی نے اہم ملاقات کی، جس کے دوران ملک کی مجموعی امن و امان بالخصوص خیبر پختونخوا اور بلوچستان کی سیکیورٹی صورتحال پر تفصیلی تبادلہ خیال کیا گیا۔ وفاقی وزیرِ داخلہ محسن نقوی نے صدرِ مملکت کو انسدادِ دہشت گردی کے لیے جاری اقدامات اور متعلقہ علاقوں کی سیکیورٹی صورتحال پر جامع بریفنگ دی۔ اس موقع پر صدر آصف علی زرداری نے دہشت گردی کے خلاف پاک افواج، پولیس اور دیگر قانون نافذ کرنے والے اداروں کی پیشہ ورانہ صلاحیتوں اور قربانیوں کو خراجِ تحسین پیش کرتے ہوئے کہا کہ ملک سے دہشت گردی کے مکمل خاتمے اور پائیدار امن کے قیام کے لیے پوری قوم اپنی سیکیورٹی فورسز کے شانہ بشانہ کھڑی ہے۔ ملاقات میں ملک کی موجودہ سیاسی صورتحال اور باہمی دلچسپی کے دیگر اہم قومی امور پر بھی سیر حاصل گفتگو کی گئی۔