پنجاب کی تاریخ اور ثقافتی ورثے کی خاموش گواہ مہاراجہ رنجیت سنگھ کی سمادھی

تاریخی شہر لاہور میں لاہور قلعہ اور بادشاہی مسجد کے قریب واقع ‘شیرِ پنجاب’ مہاراجہ رنجیت سنگھ کی سمادھی برصغیر کی تاریخ، ثقافت اور فنِ تعمیر کی ایک عظیم الشان یادگار ہے۔ 1780 میں گوجرانوالہ میں پیدا ہونے والے سکھ سلطنت کے بانی مہاراجہ رنجیت سنگھ کا انتقال 1839 میں ہوا، جس کے بعد ان کی سمادھی کی تعمیر ان کے فرزند مہاراجہ کھڑک سنگھ نے شروع کروائی۔ گوردوارہ ڈیرہ صاحب کے ہیڈ گرنتھی گیانی رنجیت سنگھ کے مطابق یہ عمارت پہلے ایک بارہ دری تھی جسے بعد میں سمادھی کی شکل دی گئی۔ سکھ، مغل اور ہندو طرزِ تعمیر کے دلکش امتزاج پر مشتمل یہ عمارت دنیا بھر سے آنے والے زائرین اور مورخین کی توجہ کا مرکز بنی ہوئی ہے اور لاہور کے تاریخ و ورثے کا اہم حصہ سمجھی جاتی ہے۔