سانس لینے میں دشواری، چھٹی مانگنے پر باس نے ملازم کو کیا کہا؟

بھارت میں ایک سوشل میڈیا صارف نے کام کی جگہ پر غیر انسانی رویے سے متعلق واقعہ بیان کرتے ہوئے بتایا ہے کہ شدید صحت کے مسائل کے باوجود اس کی باس نے چھٹی یا کسی بھی قسم کا ریلیف دینے سے انکار کر دیا۔

صارف کے مطابق دفاتر میں بیماری کی بنیاد پر چھٹی لینا ایک معمول کی بات سمجھی جاتی ہے، خاص طور پر جب مسئلہ سنگین ہو، تاہم اسے سانس لینے میں شدید دشواری کا سامنا تھا، اس کے باوجود کام کی ڈیڈ لائن کو ترجیح دی گئی۔

متاثرہ صارف نے بتایا کہ وہ سانس نہیں لے پا رہا تھا اور دفتر بند ہونے میں صرف پانچ منٹ باقی تھے، اسی دوران ایک ساتھی آیا اور کہا کہ ڈیڈ لائن مکمل کرنا ضروری ہے۔ صارف کا کہنا تھا کہ اس نے کولیگ کو اپنی حالت سے آگاہ کرتے ہوئے ڈاکٹر کے پاس جانے کی ضرورت پر زور دیا، مگر اس کی بات نظر انداز کر دی گئی اور اسے باس سے بات کرنے کا کہا گیا۔

صارف کے مطابق جب اس نے باس کو اپنی حالت بتائی تو جواب ملا کہ وقت کم ہے، کچھ دیر آرام کرو اور کام اگلی صبح مکمل کر لینا۔

واقعے پر ردِعمل دیتے ہوئے صارف نے کہا کہ بعض اوقات باسز یہ بھول جاتے ہیں کہ دفتر میں کام کرنے والے لوگ بھی انسان ہوتے ہیں، مشینیں نہیں۔ سوشل میڈیا پر اس واقعے کے بعد کام کی جگہ پر ذہنی دباؤ اور ملازمین کی صحت سے متعلق رویوں پر بحث شروع ہو گئی ہے۔