دہشتگرد انسانیت کے دشمن ہیں: حنیف عباسی کی سوات میں خودکش دھماکے کی شدید مذمت

وفاقی وزیر ریلوے محمد حنیف عباسی نے سوات کے علاقے کبل میں ہونے والے خودکش دھماکے کی شدید الفاظ میں مذمت کرتے ہوئے قیمتی انسانی جانوں کے ضیاع پر گہرے دکھ اور افسوس کا اظہار کیا ہے۔

وفاقی وزیر نے اپنے بیان میں درج ذیل نکات پر زور دیا۔ انہوں نے شہداء کے درجات کی بلندی، غمزدہ لواحقین کے لیے صبرِ جمیل اور دھماکے میں زخمی ہونے والوں کی جلد و مکمل صحت یابی کے لیے دعا کی۔  حنیف عباسی نے کہا کہ معصوم شہریوں کو نشانہ بنانے والے عناصر انسانیت کے دشمن ہیں۔ قوم دہشت گردی کے خلاف متحد ہو کر دشمن کی ہر سازش کو ناکام بنائے گی۔  انہوں نے کہا کہ دہشت گردی کے ناسور کے مکمل خاتمے کے لیے ریاستی اداروں کی کوششیں قابلِ تحسین ہیں اور پوری قوم ان کے شانہ بشانہ کھڑی ہے۔  وفاقی وزیر نے خیبر پختونخوا پولیس، سیکیورٹی فورسز اور قانون نافذ کرنے والے اداروں کی عظیم قربانیوں کو خراجِ تحسین پیش کرتے ہوئے کہا کہ ان کی بہادری ملک کے امن و امان کی ضمانت ہے۔