یونان میں جنگلاتی آگ بجھاتے 2 ہیلی کاپٹر ٹکرا گئے، عملے کے 2 افراد ہلاک

یونان کے دارالحکومت ایتھنز کے مغرب میں واقع پساتھا کے جنگلات میں آگ بجھانے کی امدادی کارروائیوں کے دوران فائر ڈپارٹمنٹ کے 2 ہیلی کاپٹر فضا میں آپس میں ٹکرا گئے۔ خبر ایجنسی کے مطابق حادثہ اس وقت پیش آیا جب ایک ہیلی کاپٹر دوسرے ہیلی کاپٹر کے نچلے حصے سے جا ٹکرایا، جس کے نتیجے میں وہ زوردار دھماکے سے پھٹ کر زمین پر جا گرا۔ اس المناک حادثے میں تباہ ہونے والے ہیلی کاپٹر میں سوار ڈنمارک سے تعلق رکھنے والا پائلٹ اور یونان فائر سروس کا ایک افسر ہلاک ہو گئے۔

فائر سروس کے ڈائریکٹر کمیونیکیشنز نے حادثے کی تصدیق کرتے ہوئے بتایا کہ شدید زخمی اور بے ہوشی کی حالت میں عملے کے دونوں افراد کو فوری طور پر اسپتال منتقل کیا گیا، تاہم وہ زخموں کی تاب نہ لاتے ہوئے دم توڑ گئے۔ حادثے کے شکار دوسرے ہیلی کاپٹر کے عملے کو محفوظ طریقے سے بچا لیا گیا ہے۔ واضح رہے کہ سیکڑوں فائر فائٹرز ایتھنز کے مغرب میں لگی ہولناک آگ کو آبادی والے مضافاتی علاقوں تک پھیلنے سے روکنے کے لیے آپریشن میں مصروف ہیں، جبکہ حکام نے حادثے کی تفصیلی تحقیقات مکمل ہونے تک علاقے میں فائر فائٹنگ ہیلی کاپٹروں کی پروازیں معطل کر دی ہیں۔