یادداشت پر دستخط شوریٰ کونسل کی اجتماعی دانشمندی کا نتیجہ ہے، ایرانی صدر

ایرانی صدر مسعود پزشکیان نے کہا ہے کہ جس یادداشت (Memorandum) پر دستخط کیے گئے ہیں وہ ایران کی سپریم نیشنل سیکورٹی کونسل (شوریٰ کونسل) کے ارکان کی اجتماعی دانشمندی اور باہمی مشاورت کا نتیجہ ہے۔ سوشل میڈیا پلیٹ فارم ایکس (سابقہ ٹوئٹر) پر جاری اپنے بیان میں انہوں نے واضح کیا کہ کونسل کے تمام ارکان اس دستاویز پر مکمل طور پر متفق اور ہم آہنگ ہیں۔ ایرانی صدر نے اعتماد کا اظہار کیا کہ یہ تاریخی یادداشت آنے والے دنوں اور مستقبل میں ایران کی مجموعی خارجہ پالیسی کے لیے سنگِ میل اور بنیاد کی حیثیت اختیار کرے گی۔

مسعود پزشکیان نے اپنے بیان میں زور دیا کہ اس یادداشت پر اس کی روح کے مطابق عملدرآمد کو یقینی بنانے کے لیے لازم ہے کہ دشمن کو اس کے کیے گئے تمام وعدوں کا پابند بنایا جائے۔ انہوں نے مزید کہا کہ اس اہم دستاویز کے مکمل اور مؤثر نافذ العمل ہونے سے نہ صرف ایران کی اپنی قومی سلامتی کو استحکام ملے گا بلکہ اس سے پورے خطے اور اتحادی ممالک کے امن، سیکیورٹی اور پائیدار استحکام کو بھی مزید تقویت حاصل ہوگی۔