حبا بخاری نے سوشل میڈیا پر اپنے تین ناموں کی وجہ بتا دی

پاکستانی شوبز انڈسٹری کی معروف اداکارہ حبا بخاری نے سوشل میڈیا پر اپنے مختلف ناموں کے استعمال سے متعلق مداح کے سوال کا جواب دے دیا ہے۔ حبا بخاری نے حال ہی میں ایک نجی ٹی وی کے مزاحیہ پروگرام میں شرکت کی جہاں انہوں نے اپنے کیریئر، ذاتی زندگی اور سوشل میڈیا سے جڑے معاملات پر کھل کر گفتگو کی۔

پروگرام کے دوران ایک مداح نے سوال کیا کہ انسٹاگرام پر ان کے تین نام—حبا قادر، حبا بخاری اور حبا آریز—کیوں استعمال کیے جاتے ہیں اور انہیں کون سا نام زیادہ پسند ہے؟ اس پر حبا بخاری نے وضاحت کی کہ بخاری ان کا کاسٹ نام ہے جبکہ قادر ان کے والد کا نام ہے۔ انہوں نے کہا کہ آریز کا نام انہوں نے آفیشلی تبدیل نہیں کیا کیونکہ اس کی ضرورت محسوس نہیں کی، تاہم انہیں بخاری کہلوانا پسند ہے اور دوست بھی انہیں بخاری صاحبہ کہہ کر پکارتے ہیں۔

اداکارہ نے مزید کہا کہ والد کا نام ہمیشہ ساتھ ہونا چاہیے اور اسے تبدیل کرنے کی کوئی وجہ نہیں۔ ایک سوال کے جواب میں حبا بخاری نے کہا کہ انہیں اپنے شوہر کے ساتھ اسکرین پر خود کو زیادہ بہتر محسوس ہوتا ہے اور ان کے خیال میں ڈراموں میں کوئی اور ان کے ساتھ اتنا اچھا نہیں لگتا۔

حبا بخاری نے شہرت کے حوالے سے بات کرتے ہوئے کہا کہ فیم کے معاملے میں ان کا اصل ٹرننگ پوائنٹ ابھی تک نہیں آیا۔ انہوں نے کہا کہ مداحوں کی یادداشت بہت مختصر ہوتی ہے، ان کا پہلا ڈرامہ زیادہ نوٹس نہیں کیا گیا، پھر ایک اور ڈرامہ آیا اور اس کے بعد ایک سال کا وقفہ آگیا۔ ان کا کہنا تھا کہ اگر اداکارہ کچھ عرصے کے لیے نظر نہ آئے تو لوگ سوال کرنے لگتے ہیں کہ آیا وہ اداکاری کر رہی ہیں یا شادی کے بعد انڈسٹری چھوڑ چکی ہیں۔