آذربائیجان کے راستے یورپ جانے کی غیر قانونی کوشش ناکام، 3 مسافر آف لوڈ

وفاقی تحقیقاتی ادارے (FIA) امیگریشن ملتان نے آذربائیجان کے راستے یورپ جانے کی غیر قانونی کوشش کو ناکام بناتے ہوئے 3 مسافروں کو پرواز سے آف لوڈ کر کے گرفتار کر لیا ہے۔

ترجمان ایف آئی اے کے مطابق یہ کارروائی ملتان ایئرپورٹ پر کی گئی جہاں فلائی دبئی کی پرواز (FZ-326) کے ذریعے آذربائیجان جانے والے مسافروں حافظ آصف، طارق بشیر اور محمد الیاس کا سفری پروفائل مشکوک پایا گیا۔ شک گزرنے پر جب مسافروں کے موبائل فونز کی جانچ پڑتال کی گئی تو ان کے واٹس ایپ اور میسجز سے انکشاف ہوا کہ وہ آذربائیجان پہنچ کر وہاں سے سربیا اور دیگر یورپی ممالک میں غیر قانونی طور پر داخل ہونے کی منصوبہ بندی کر رہے تھے۔

ابتدائی تفتیش کے دوران ملزمان نے اعتراف کیا کہ انہوں نے اس غیر قانونی سفر کے لیے وہاڑی کے ٹریول ایجنٹوں کو فی کس 6 لاکھ روپے ادا کیے تھے، جبکہ بقایا رقم یورپ میں اپنی حتمی منزل پر پہنچنے کے بعد دی جانی تھی۔ ایف آئی اے امیگریشن نے تینوں مسافروں کو مزید تفتیش اور ٹریول ایجنٹوں کے خلاف قانونی کارروائی کے لیے اینٹی ہیومن ٹریفکنگ سرکل ملتان کے حوالے کر دیا ہے۔