روس پر یوکرین کے بڑے ڈرون حملے، ماسکو کی جانب 630 ڈرونز کی پرواز، تین افراد زخمی

روسی دارالحکومت ماسکو اور لیپتسک (Lipetsk) ریجن کو یوکرینی ڈرونز کی جانب سے شدید حملوں کا سامنا کرنا پڑا ہے۔ حکام کے مطابق یہ رواں سال ماسکو پر کیے جانے والے سب سے بڑے ڈرون حملوں میں سے ایک ہے۔

ماسکو کے میئر سرگئی سوبیانین (Sergei Sobyanin) نے میسجنگ ایپ پر اپنے بیان میں بتایا کہ 21 اکتوبر کی رات سے 22 اکتوبر 2026 کی صبح کے درمیان مجموعی طور پر 630 ڈرونز نے روسی دارالحکومت کی جانب پرواز کی۔ روسی فضائی دفاعی نظام (Air Defense System) نے اکثر ڈرونز کو شہر سے کافی فاصلے پر ہی تباہ کر دیا، جبکہ دارالحکومت کے قریب پہنچنے والے 163 ڈرونز کو مار گرایا گیا۔ حملے کے نتیجے میں ماسکو کے جنوب مغربی اضلاع (تروئٹسکی اور نووموسکوفسکی) کے علاقے وورونووو کے قریب 2 افراد زخمی ہوئے۔

دوسری جانب لیپتسک ریجن کے گورنر ایگور آرتامونوف کے مطابق ڈرون حملے میں متعدد رہائشی عمارتیں اور ایک پولی کلینک شدید متاثر ہوئے جبکہ ایک 25 سالہ شہری زخمی ہوا۔ یاد رہے کہ اس سے قبل 19 ستمبر کو ماسکو پر تاریخ کا سب سے بڑا ڈرون حملہ کیا گیا تھا جس میں 1,600 سے زائد ڈرونز کا استعمال ہوا تھا۔