صارفین کے ڈیٹا سے متعلق گمراہ کن معلومات، میٹا پر 25 ارب ڈالر جرمانہ عائد

امریکی ریاست نیو میکسیکو (New Mexico) کی ایک عدالت نے فیس بک، انسٹاگرام اور واٹس ایپ کی مالک کمپنی میٹا (Meta) کو صارفین کے ڈیٹا کی رازداری (Data Privacy) کے حوالے سے سالہا سال عوام کو گمراہ کرنے کا مجرم قرار دیتے ہوئے 25 ارب ڈالر کا تاریخی جرمانہ ادا کرنے کا حکم دیا ہے۔

ریاستی جج فرانسس میتھیو نے تحریری حکم جاری کرتے ہوئے قرار دیا کہ کمپنی کی جانب سے ڈیٹا سیکیورٹی پر عوام کو دھوکہ دینا اس کے بنیادی کاروباری نظام کی سنگین خلاف ورزی ہے جس سے کروڑوں افراد متاثر ہوئے۔ یہ مقدمہ 2021 میں اس وقت قائم کیا گیا تھا جب برطانوی سیاسی کمپنی کیمبرج اینالیٹیکا (Cambridge Analytica) کی جانب سے فیس بک کے تقریباً 8 کروڑ 70 لاکھ صارفین کے ذاتی ڈیٹا تک غیر قانونی رسائی کا انکشاف ہوا تھا، جسے 2016 کے امریکی صدارتی الیکشن میں ووٹرز کی پروفائلنگ کے لیے استعمال کیا گیا تھا۔ جیوری کے مطابق میٹا نے صارفین کی رازداری، نفرت انگیز مواد اور گمراہ کن بیانات کے ذریعے ریاستی قوانین کی 4 کروڑ 30 لاکھ سے زائد بار خلاف ورزی کی۔

نیو میکسیکو کے اٹارنی جنرل راؤل ٹوریس نے فیصلے کا خیرمقدم کرتے ہوئے اسے امریکی تاریخ کے سب سے بڑے جرمانوں میں سے ایک قرار دیا اور کہا کہ بڑی ٹیک کمپنیوں کے احتساب کا وقت آ گیا ہے۔ دوسری جانب میٹا کے چیف لیگل آفیسر سی جے مہونی نے اس سخت فیصلے کے خلاف اپیل میں جانے کا اعلان کرتے ہوئے کہا ہے کہ اس نوعیت کے جرمانوں سے ریاست میں کاروبار کرنا ناممکن ہو جائے گا۔