آسٹریلیا: اے آئی سے تیار کردہ گانوں کو میوزک چارٹس سے خارج کرنے کا فیصلہ

کینبرا: آسٹریلیا میں مصنوعی ذہانت (AI) کے ذریعے مکمل طور پر تیار کیے جانے والے گانوں کو ملک کے سرکاری اور مستند میوزک چارٹس سے خارج کرنے کا اہم فیصلہ سامنے آیا ہے۔

آسٹریلین ریکارڈنگ انڈسٹری ایسوسی ایشن (ARIA) نے باضابطہ اعلان کیا ہے کہ رواں ہفتے سے جنریٹو اے آئی کے ذریعے بنائے گئے ایسے گانے، جن میں انسانوں کا تخلیقی کردار شامل نہیں ہے، وہ مشہور “اے آر آئی اے چارٹس” (ARIA Charts) میں شامل ہونے کے اہل نہیں ہوں گے۔

تاہم تنظیم نے واضح کیا کہ اگر کسی گانے کی تیاری میں مصنوعی ذہانت کا استعمال صرف ایک معاون ٹول (Assisting Tool) کے طور پر کیا گیا ہو اور اس کا اصل تخلیقی و بنیادی کام انسانوں نے ہی سرانجام دیا ہو، تو ایسے گانوں کو چارٹس کی درجہ بندی میں جگہ مل سکے گی۔

موسیقی کی صنعت کے ماہرین نے اس فیصلے کو انسانی فنکارانہ صلاحیتوں کے دفاع اور تخلیقی حقوق کے تحفظ کی جانب ایک اہم پیش رفت قرار دیا ہے۔