حضور نبی اکرم ﷺ کی آمد انسانیت کیلئے ہدایت کا ذریعہ ہے، گورنر پنجاب

گورنر پنجاب سردار سلیم حیدر خان نے کہا ہے کہ حضور نبی اکرم ﷺ کی آمد مبارک پوری انسانیت کے لیے ہدایت کا سرچشمہ اور دائمی ذریعہ ہے۔ لاہور میں منہاج القرآن کے زیرِ اہتمام 43ویں سالانہ عالمی میلاد النبی ﷺ کانفرنس سے خطاب کرتے ہوئے گورنر پنجاب نے کہا کہ مینارِ پاکستان پر اس شاندار اور باوقار کانفرنس کا انعقاد تحریک منہاج القرآن کا بڑا اعزاز ہے۔ انہوں نے ڈاکٹر طاہر القادری کی دینی و علمی خدمات کو سراہتے ہوئے کہا کہ انہوں نے علم و حکمت کے میدان میں نمایاں مقام حاصل کیا اور انتہا پسندی، دہشت گردی اور باہمی نفرت کے خاتمے کے لیے ہمیشہ مثبت اور مؤثر کردار ادا کیا۔ سردار سلیم حیدر خان نے منہاج القرآن کے کارکنان کے نظم و ضبط کی تعریف کی اور ڈاکٹر طاہر القادری کی صحت و درازیِ عمر کی دعا کرتے ہوئے کہا کہ ملتِ اسلامیہ اور پاکستان ہمیشہ ان کی علمی رہنمائی سے استفادہ کرتے رہیں گے۔