سعودی کابینہ کا آبی گزرگاہوں کو کھلا اور محفوظ رکھنے کی ضرورت پر زور

ریاض: خادم الحرمین الشریفین شاہ سلمان بن عبدالعزیز آل سعود کی زیرِ صدارت سعودی کابینہ کا اہم اجلاس منعقد ہوا، جس میں عالمی و علاقائی سیکیورٹی صورتحال اور بین الاقوامی آبی گزرگاہوں کے تحفظ پر تفصیلی غور کیا گیا۔

سعودی کابینہ کے اجلاس کے دوران خطے میں جاری کشیدگی میں کمی لانے اور تنازعات کے پرامن حل کے لیے جاری تمام سفارتی کوششوں کی مکمل حمایت کا اعادہ کیا گیا۔ اجلاس میں آزادانہ بحری آمدورفت (Freedom of Navigation) اور بین الاقوامی شپنگ راستوں کو محفوظ اور کھلا رکھنے کی اہمیت پر زور دیا گیا۔

کابینہ نے سعودی ولی عہد و وزیراعظم شہزادہ محمد بن سلمان اور فرانسیسی صدر کے درمیان ہونے والی حالیہ ملاقات کے مثبت نتائج کو سراہا۔ اجلاس کے دوران پاکستان، فرانس اور دیگر دوست ممالک کے ساتھ تاریخی تعلقات اور سٹریٹجک تعاون کو مزید مضبوط بنانے کے عزم کا اظہار بھی کیا گیا۔