وزیر اطلاعات پنجاب عظمیٰ بخاری نے الحمراء میں سمر کیمپ کی نمائش کا افتتاح کردیا

وزیر اطلاعات و ثقافت پنجاب عظمیٰ بخاری نے الحمراء میں سمر کیمپ کے تحت منعقدہ نوجوان فنکاروں کے فن پاروں کی نمائش کا باقاعدہ افتتاح کر دیا ہے۔ اس نمائش میں 40 نوجوان آرٹسٹوں کے تخلیق کردہ 85 خوبصورت فن پارے پیش کیے گئے، جن میں ڈرائنگ، پینٹنگ، خطاطی اور دیگر مختلف میڈیمز میں تیار کردہ کام شامل ہے۔ نمائش کی ایک خاص پیش کش وزیراعلیٰ پنجاب مریم نواز شریف کا پورٹریٹ تھا، جسے نوجوان فنکاروں نے اپنی فنی مہارت اور تخلیقی وژن سے تیار کر کے شائقین کی توجہ کا مرکز بنایا۔

افتتاحی تقریب کے دوران عظمیٰ بخاری نے نوجوان آرٹسٹوں کے کام کی شدید پذیرائی کرتے ہوئے کہا کہ ان کی تخلیقی صلاحیتیں قابلِ تحسین ہیں اور یہی نوجوان آگے چل کر مستقبل کے نامور سٹار آرٹسٹ بنیں گے۔ انہوں نے کہا کہ وزیراعلیٰ مریم نواز شریف کے وژن کے تحت الحمراء نئی نسل کو اپنے فن کے اظہار کے لیے بہترین مواقع فراہم کر رہا ہے اور حکومت پنجاب فن و ثقافت کے فروغ کے لیے پرعزم ہے۔ تقریب میں سیکرٹری اطلاعات و ثقافت سید طاہر رضا ہمدانی اور ایگزیکٹو ڈائریکٹر الحمراء محمد نواز گوندل بھی موجود تھے۔ عظمیٰ بخاری نے کلاس ٹیچرز عثمان خالد اور فاطمہ خان کی کاوشوں کو سراہا اور سمر کیمپ کے تمام شرکاء میں اسناد بھی تقسیم کیں۔