پاکستان کی پہلی چاند گاڑی کا نام جناح-1 رکھ دیا گیا

پاکستان کے قومی خلائی ادارے ‘سپارکو’ (SUPARCO) نے پاکستان کے پہلے قمری روور (چاند گاڑی) کے سرکاری نام کا باضابطہ اعلان کر دیا ہے۔ ملک گیر سطح پر کرائے گئے ایک مقابلے کے بعد پاکستان کے پہلے قمری روور کا نام ‘جناح-1’ رکھا گیا ہے۔ اس نام کے انتخاب کے لیے سپارکو کو ملک بھر سے 4 ہزار سے زائد تجاویز موصول ہوئی تھیں، جن میں سے 7 افراد نے ‘جناح-1’ نام تجویز کیا تھا۔ حتمی فاتح کا انتخاب قرعہ اندازی کے ذریعے کیا گیا جس میں بہاول نگر سے تعلق رکھنے والے 17 سالہ طالب علم طیب کریم نے کامیابی حاصل کی۔

تقریب سے خطاب کرتے ہوئے چیئرمین سپارکو نے بتایا کہ ‘جناح-1’ کا نام بانیٔ پاکستان قائد اعظم محمد علی جناح کو خراجِ عقیدت پیش کرنے کے ساتھ ساتھ ملک کے عزم، سائنسی ترقی اور خلائی افق کی نئی تعبیر کو ظاہر کرتا ہے۔ سپارکو کے مطابق یہ پاکستانی ساختہ قمری روور 2029ء میں چین کے ‘چانگ ای-8’ (Chang’e 8) مشن کے ذریعے چاند کے جنوبی قطب (South Pole) کے لیے روانہ کیا جائے گا۔ ‘جناح-1’ چاند کی سطح پر پلازما، تابکاری اور وہاں کے جغرافیہ کا باریک بینی سے مطالعہ کرے گا، جو مستقبل کی قمری تحققیات اور خلائی علوم میں پاکستان کے لیے ایک بڑا سنگِ میل ثابت ہو گا۔