یمنی حوثیوں کا سعودی عرب سے جارحیت روکنے اور ناکہ بندی ختم کرنے کا مطالبہ

یمن کے ایران نواز حوثی گروہ نے سعودی عرب سے مطالبہ کیا ہے کہ وہ یمن میں جاری فوجی کارروائیاں روکنے، ناکہ بندی کا خاتمہ کرنے اور تمام غیر قانونی سرگرمیوں کو ختم کرنے کا جرات مندانہ اور دانشمندانہ فیصلہ کرے۔ حوثیوں کے زیرِ انتظام ‘صبا نیوز ایجنسی’ پر جاری بیان میں کہا گیا ہے کہ اس فیصلے سے دونوں ممالک کو کوئی نقصان نہیں پہنچے گا بلکہ خطے میں امن کے مثبت نتائج برآمد ہوں گے۔

حوثی ترجمان نے خبردار کیا کہ سعودی قیادت میں قائم اتحاد کے لیے یمن میں فوجی مداخلیت جاری رکھنے سے بہتر ہے کہ وہ امن کی راہ اختیار کرے، کیونکہ ماضی کی کارروائیوں سے سعودی عرب کو جو مالی و عسکری نقصان پہنچا ہے، آئندہ ہونے والے نقصانات اس سے کہیں زیادہ شدید ہوں گے۔

یہ بیان حوثیوں کی جانب سے یمنی سرکاری افواج اور بحیرۂ احمر میں سعودی مفادات و بحری جہازوں پر کیے گئے حالیہ حملوں اور جولائی میں اعلانیہ بحری ناکہ بندی کی لہر کے فوراً بعد سامنے آیا ہے، جس سے خطے میں کشیدگی کی نئی لہر پیدا ہو گئی ہے۔