پاکستان کی بڑی جیت، چاول برآمدگی کیس میں بھارت کی اپیل خارج

پاکستان نے باسمتی چاول کے برآمدی حقوق کے معاملے میں ایک اہم عالمی اور قانونی کامیابی حاصل کر لی ہے، جہاں آسٹریلیا کی وفاقی عدالت نے بھارتی ادارے ‘ایگریکلچرل اینڈ پروسیسڈ فوڈ پروڈکٹس ایکسپورٹ ڈیولپمنٹ اتھارٹی’ (APEDA) کی ٹریڈ مارک سے متعلق اپیل کو مکمل طور پر مسترد کر دیا ہے۔ آسٹریلوی عدالت نے نہ صرف اپیڈا کی درخواست خارج کی بلکہ بھارتی ادارے کو مخالف فریق کے تمام قانونی اخراجات بھی برداشت کرنے کا حکم سنایا۔ واضح رہے کہ بھارتی ادارے نے آسٹریلیا میں باسمتی کو ایک مخصوص سرٹیفکیشن ٹریڈ مارک کے طور پر رجسٹر کرانے کی کوشش کی تھی، جسے آسٹریلوی رجسٹرار آف ٹریڈ مارکس نے 22 دسمبر 2022 کو ہی رد کر دیا تھا، اور اب وفاقی عدالت نے بھی اس ابتدائی فیصلے کو برقرار رکھتے ہوئے پاکستان کے حق میں فیصلہ سنایا ہے۔

پاکستانی وزارتِ تجارت نے اس تاریخی فیصلے کا پرجوش خیرمقدم کرتے ہوئے کہا ہے کہ یہ فیصلہ باسمتی چاول پر پاکستان کے اصولی، تاریخی اور مستقل مؤقف کی فتح ہے۔ آسٹریلوی رجسٹرار اور وفاقی عدالت کے فیصلوں میں واضح طور پر تسلیم کیا گیا ہے کہ ‘باسمتی’ کوئی ایسا لفظ نہیں جس پر صرف بھارتی ادارے کا حق ہو، بلکہ یہ چاول تاریخی طور پر پاکستان میں بھی کاشت ہوتا ہے اور پاکستانی تاجروں کو بھی اس نام کو بین الاقوامی مارکیٹ میں استعمال کرنے کا برابر اور قانونی حق حاصل ہے۔ پاکستان کا ہمیشہ سے یہی موقف رہا ہے کہ باسمتی ایک مشترکہ جغرافیائی شناخت (Geographical Indication) ہے جو خطے کی تاریخ سے جڑی ہوئی ہے، لہٰذا کسی ایک ملک یا ادارے کو اس پر اجارہ داری قائم کرنے کی اجازت نہیں دی جا سکتی۔