براڈ پیک حادثے میں لاپتہ ہونے والے پاکستانی کوہ پیما سہیل سخی کی لاش مل گئی

الپائن کلب آف پاکستان نے تصدیق کی ہے کہ دنیا کی بارہویں بلند ترین چوٹی ‘براڈ پیک’ پر پیش آنے والے حادثے کے بعد لاپتا ہونے والے ہنزہ سے تعلق رکھنے والے پاکستانی کوہ پیما سہیل سخی کی لاش مل گئی ہے۔ شگر کے مقامی رضاکاروں جن میں محمد ندیم، محمد بشیر، اور ابوذر شامل تھے، نے دیگر ساتھیوں کی مدد سے اپنی مدد آپ کے تحت سہیل سخی کی لاش تلاش کر کے اسے کیمپ ون سے بیس کیمپ منتقل کر دیا ہے۔

الپائن کلب کا کہنا ہے کہ موسم سازگار ہونے کی صورت میں سہیل سخی کی لاش کو ہیلی کاپٹر کے ذریعے فوری طور پر اسکردو منتقل کیا جائے گا۔ الپائن کلب آف پاکستان نے کوہ پیما کے سوگوار خاندان اور پوری کوہ پیمائی برادری سے دلی تعزیت اور ہمدردی کا اظہار کیا ہے۔ واضح رہے کہ تقریباً 15 روز قبل براڈ پیک پر برفانی تودہ گرنے کا المناک واقعہ پیش آیا تھا جس کے نتیجے میں 10 کوہ پیما لاپتا ہو گئے تھے، جن میں سے 5 نیپالی کوہ پیماؤں سمیت مجموعی طور پر 7 کوہ پیماؤں کی لاشیں پہلے ہی نکال لی گئی تھیں۔