کالعدم جوائنٹ ایکشن کمیٹی نے 8 اہلکاروں کو اغوا کرلیا: آزاد کشمیر پولیس

آزاد جموں و کشمیر پولیس کے ترجمان ایس ایس پی خاور علی شوکت نے راولاکوٹ میں اہم پریس کانفرنس کرتے ہوئے انکشاف کیا ہے کہ کالعدم تنظیم ‘عوامی جوائنٹ ایکشن کمیٹی’ نے ہائی وے پولیس کے 8 اہلکاروں کو اغوا کر کے ان پر تشدد کیا ہے۔ انہوں نے کالعدم تنظیم کو سخت خبردار کرتے ہوئے مطالبہ کیا ہے کہ وہ تمام مغوی پولیس اہلکاروں کو فوری طور پر رہا کرے، کیونکہ اگر ان کو کوئی نقصان پہنچا تو اس کے نتائج انتہائی سنگین ہوں گے۔پولیس ترجمان کا کہنا تھا کہ شرپسند عناصر راولاکوٹ میں خواتین اور بچوں کو ڈھال کے طور پر استعمال کر کے عوام کی زندگی اجیرن کر رہے ہیں اور ان کا واحد مقصد ریاستی عملداری کو کمزور کرنا ہے۔ انہوں نے واضح کیا کہ ریاست کا تحمل سے کام لینا اس کی کمزوری نہیں، کوئی بھی قانون سے بالا تر نہیں اور آزاد کشمیر کے عوام نے اس پرتشدد احتجاج اور شرپسندوں سے مکمل لاتعلقی کا اظہار کیا ہے۔ ایس ایس پی خاور علی شوکت نے والدین سے بھی اپیل کی کہ وہ اپنے بچوں پر نظر رکھیں اور انہیں ان عناصر کے مذموم عزائم کا شکار ہونے سے بچائیں۔