کالعدم جوائنٹ ایکشن کمیٹی نے 8 اہلکاروں کو اغوا کرلیا: آزاد کشمیر پولیس

آزاد جموں و کشمیر پولیس کے ترجمان ایس ایس پی خاور علی شوکت نے ایک اہم پریس کانفرنس کرتے ہوئے دعویٰ کیا ہے کہ راولاکوٹ میں ہائی وے پولیس کے 8 اہلکاروں کو اغوا کر کے ان پر تشدد کیا گیا ہے۔ پولیس ترجمان نے کہا کہ علاقے میں امن و امان کی صورتحال کو خراب کیا جا رہا ہے، جس کے باعث شہریوں خصوصاً خواتین اور بچوں کی زندگی متاثر ہو رہی ہے۔ انہوں نے متنبہ کیا کہ مغوی پولیس اہلکاروں کو فوراً رہا کیا جائے، اور اگر انہیں کوئی نقصان پہنچا تو اس کے نتائج انتہائی سنگین ہوں گے۔

ایس ایس پی خاور علی شوکت کا کہنا تھا کہ پرتشدد کارروائیاں اور ریاستی املاک کو نقصان پہنچانا کسی صورت قابلِ قبول نہیں ہے، اور کوئی بھی شخص قانون سے بالاتر نہیں۔ انہوں نے کہا کہ پولیس اور ریاست مسلسل صبر و تحمل کا مظاہرہ کر رہے ہیں، لیکن اس تحمل کو ریاست کی کمزوری نہ سمجھا جائے۔ پولیس ترجمان نے والدین سے بھی اپیل کی کہ وہ اپنے بچوں پر نظر رکھیں اور انہیں پرتشدد یا غیر قانونی سرگرمیوں کا حصہ بننے سے روکیں تاکہ خطے میں قانون کی عملداری اور امن و امان بحال رہے