ملک بھر کیلئے فی یونٹ بجلی مسلسل 3 ماہ تک مہنگی ہونے کا امکان

کراچی سمیت ملک بھر کے بجلی صارفین پر معاشی بوجھ میں مزید اضافے کا امکان ہے، جہاں نیشنل الیکٹرک پاور ریگولیٹری اتھارٹی (نیپرا) کی جانب سے فی یونٹ بجلی مسلسل تین ماہ تک مہنگی کی جا سکتی ہے۔ نیپرا کے مطابق سہ ماہی ایڈجسٹمنٹ (Quarterly Adjustment) کی مد میں فی یونٹ بجلی میں فی ماہ تقریباً 1 روپیہ 34 پیسے تک کا اضافہ کیا جا سکتا ہے۔

بجلی تقسیم کار کمپنیوں (DISCOs) کی جانب سے دائر کی گئی درخواست پر نیپرا نے باضابطہ سماعت کے بعد فیصلہ محفوظ کر لیا ہے۔ اتھارٹی کا کہنا ہے کہ اعداد و شمار کی مکمل اور تفصیلی جانچ پڑتال کے بعد حتمی فیصلہ جاری کیا جائے گا۔ ذرائع کے مطابق اگر نیپرا اس درخواست کی منظوری دے دیتا ہے تو اس فیصلے کے نتیجے میں ملک بھر کے بجلی صارفین پر تقریباً 34 ارب روپے کا اضافی مالی بوجھ پڑے گا۔