اعلیٰ عدلیہ کے ججز کی تنخواہوں اور مراعات میں بڑا اضافہ

وفاقی حکومت کی سفارش پر صدر مملکت آصف علی زرداری کی جانب سے منظوری کے بعد اعلیٰ عدلیہ کے ججز کی تنخواہوں، جوڈیشل الاؤنسز اور دیگر مراعات میں نمایاں اضافہ کر دیا گیا ہے۔ نئے فیصلے کے تحت سپریم کورٹ کے ججز کی تنخواہیں اور مراعات وفاقی آئینی عدالت کے ججز کے برابر کر دی گئی ہیں، جبکہ ہائیکورٹ کے ججز کی بنیادی تنخواہوں میں بھی اضافہ شامل ہے۔ سپریم کورٹ کے ججز کے لیے تنخواہوں میں اس اضافے کا اطلاق 10 دسمبر 2025ء سے ہوگا اور ججز کو سابقہ مدت کے بقایا جات (Arrears) بھی ادا کیے جائیں گے۔

نئے نوٹیفکیشن کے مطابق چیف جسٹس آف پاکستان کی ماہانہ بنیادی تنخواہ بڑھا کر 15 لاکھ 50 ہزار روپے مقرر کر دی گئی ہے، جبکہ سپریم کورٹ کے دیگر ججز کی بنیادی تنخواہ 11 لاکھ سے بڑھا کر 15 لاکھ روپے کر دی گئی ہے۔ سپریم کورٹ ججز کا ماہانہ جوڈیشل الاؤنس بھی 11 لاکھ 61 ہزار سے بڑھا کر 15 لاکھ روپے کر دیا گیا ہے، جس سے الاؤنس میں تقریباً 3 لاکھ 39 ہزار روپے کا اضافہ ہوا ہے، جبکہ 1 لاکھ 50 ہزار روپے ماہانہ میڈیکل الاؤنس بھی مقرر کیا گیا ہے۔ اس کے علاوہ، ہائیکورٹ کے ججز کی تنخواہوں میں اضافے کا اطلاق یکم جولائی 2026ء سے ہوگا، جس کے تحت ہائیکورٹ کے چیف جسٹس کی بنیادی تنخواہ 12 لاکھ 54 ہزار روپے اور دیگر ججز کی تنخواہ 10 لاکھ 95 ہزار سے بڑھا کر 12 لاکھ 5 ہزار روپے مقرر کی گئی ہے۔ پنشن مراعات میں ترامیم کے ساتھ دو سال سے زائد عرصہ چیف جسٹس رہنے والے ججوں کے لیے ریٹائرمنٹ کے بعد سرکاری گاڑی رعایتی قیمت پر خریدنے کی سہولت بھی فراہم کی گئی ہے۔