عوام کیلئے بری خبر، حکومت نے نیشنل سیونگز سکیموں پر منافع کی شرح کم کردی

حکومت نے نیشنل سیونگز (قومی بچت) اسکیموں پر منافع کی شرح میں نمایاں کمی کر دی ہے۔ قومی بچت اسکیم کی جانب سے جاری کردہ باقاعدہ اعلامیے کے مطابق، بہبود سیونگز سرٹیفکیٹس، پینشنرز بینیفٹ اکاؤنٹس اور شہداء فیملی ویلفیئر اکاؤنٹس پر سالانہ منافع کی شرح کم کر کے 12.96 فیصد مقرر کر دی گئی ہے۔ دوسری جانب، ریگولر انکم سرٹیفکیٹس پر ماہانہ منافع کی شرح اب 11.52 فیصد ہوگی، جس کے تحت سرمایہ کاروں کو اب ہر ایک لاکھ روپے کی سرمایہ کاری پر ماہانہ 960 روپے منافع ملے گا۔ اس کے علاوہ، اسپیشل سیونگز سرٹیفکیٹس پر پہلے 6 ماہ کے لیے منافع 11.2 فیصد اور آخری 6 ماہ کے لیے 12.6 فیصد مقرر کیا گیا ہے۔ منافع کی ان شرحوں میں کمی کا اطلاق فوری طور پر نئے سرمایہ کاروں اور پالیسیوں پر ہوگا۔