تھرپارکر: ایمبولینس میں سلنڈر دھماکا، 8 افراد جاں بحق، 4 شدید زخمی

(BHU Plus) میں کھڑی پیپلز پرائمری ہیلتھ اینڈ انیشیٹو (PPHI) کی ایمبولینس میں گیس سلنڈر پھٹنے سے ہونے والے خوفناک دھماکے اور نتیجے میں لگنے والی آگ کے باعث 8 افراد جاں بحق اور 4 شدید زخمی ہو گئے ہیں۔

ریسکیو ذرائع اور اسپتال انتظامیہ کے مطابق جاں بحق ہونے والے افراد میں ہسپتال کا عملہ کے 4 ارکان، ایک خاتون اور ایک نومولود بچہ بھی شامل ہے، جن کی لاشیں دھماکے اور آتشزدگی کے باعث بری طرح جھلس چکی ہیں اور ان کی شناخت کا عمل فی الحال جاری ہے۔ یہ ہولناک واقعہ ڈانو دھاندل کے بنیادی صحت مرکز پر اس وقت پیش آیا جب مریضوں کو طبی امداد کے لیے کہیں اور ریفر کرنے کی غرض سے ایمبولینس میں بٹھایا جا رہا تھا۔ ابتدائی معلومات کے مطابق ایمبولینس میں سلنڈر فٹ کرنے کے دوران اچانک شدید دھماکا ہوا جس نے دیکھتے ہی دیکھتے پوری گاڑی کو اپنی لپیٹ میں لے لیا۔

واقعے کی اطلاع ملتے ہی ضلعی انتظامیہ، ہیلتھ ایمرجنسی، ریسکیو 1122 اور قانون نافذ کرنے والے اداروں کے اہلکار فوری طور پر جائے وقوعہ پر پہنچ گئے اور امدادی کارروائیاں شروع کر دیں۔ اسسٹنٹ کمشنر کے مطابق حادثے میں شدید زخمی ہونے والے 4 افراد کو فوری طور پر طبی امداد کے لیے سول اسپتال مٹھی منتقل کر دیا گیا ہے، جہاں انہیں طبی سہولیات فراہم کی جا رہی ہیں، جبکہ واقعے کی وجوہات جاننے کے لیے تحقیقات بھی شروع کر دی گئی ہیں۔