پاک افغان سرحد پر فائرنگ سے متعلق افغان طالبان کا بیان جھوٹا، من گھڑت قرار

وزارت اطلاعات و نشریات نے پاک افغان سرحد پر پیش آنے والے فائرنگ کے واقعے سے متعلق افغان طالبان کے تمام دعوؤں کو سراسر جھوٹا، من گھڑت اور گمراہ کن قرار دیتے ہوئے سختی سے مسترد کر دیا ہے۔

وزارت اطلاعات و نشریات کے فیکٹ چیک یونٹ کے مطابق انگور اڈہ سرحدی واقعے پر افغان طالبان کی جانب سے پیش کیا جانے والا جھوٹا بیانیہ ایک بار پھر ان کے فریب پر مبنی طرزِ عمل اور حقیقت کو مسخ کرنے کی کوشش کی عکاسی کرتا ہے۔ وزارت اطلاعات کا کہنا ہے کہ حقیقت میں افغان طالبان فورسز نے پاکستانی حدود میں داخل ہو کر غیر مسلح شہریوں پر بلااشتعال فائرنگ کی اور شہری آبادی پر مارٹر گولے برسائے، اور طالبان رجیم کی یہ بلااشتعال جارحیت ان کے مبینہ سرپرست بھارت کی ہدایات اور ان کے پراکسی عناصر کے طے کردہ ایجنڈے کا تسلسل ہے۔

فیکٹ چیک کے مطابق پاکستانی سکیورٹی فورسز نے دشمن کی اس جارحیت کا فوری، مؤثر اور بھرپور جواب دیتے ہوئے افغان طالبان فورسز کی 7 اہم چوکیاں اور پوسٹیں تباہ کر دیں، جس کے نتیجے میں افغان طالبان کو بھاری جانی و مادی نقصان کا سامنا کرنا پڑا۔ وزارت اطلاعات و نشریات نے دوٹوک الفاظ میں کہا کہ طالبان رجیم کے نام نہاد سرکاری ترجمانوں کی جانب سے جاری کردہ ایسے من گھڑت اور بے وقعت بیانات کا زمینی حقائق سے کوئی دور کا بھی تعلق نہیں ہے، اور یہ غیر نمائندہ رجیم اپنے ہی عوام کی توجہ اصل مسائل سے ہٹا کر انہیں گمراہ کرنے کے لیے جھوٹ اور پروپیگنڈے کا سہارا لے رہی ہے۔