لطف آباد میں گھر کی دوسری منزل پر پراسرار آتشزدگی، بیوہ ماں اور دو کمسن بیٹیاں جاں بحق، قتل کا شبہ

ملتان کے علاقے بوسن روڈ سائیکل موڑ اڈا لطف آباد میں ایک گھر کی دوسری منزل پر پراسرار آتشزدگی کے واقعے میں خاتون اور اس کی دو کمسن بیٹیاں جاں بحق ہو گئی ہیں۔ آگ کی شدت کے باعث کمرے کی چھت گرنے سے تینوں ملبے تلے دب گئیں، جن کی لاشیں ریسکیو 1122 کے اہلکاروں نے امدادی کارروائی کر کے باہر نکالیں۔ جاں بحق ہونے والوں میں 35 سالہ پروین اور اس کی بیٹیاں 14 سالہ مہرین فاطمہ اور 12 سالہ الف فاطمہ شامل ہیں، جن کے والد کا ایک ماہ قبل ہی انتقال ہوا تھا۔ پولیس اور ریسکیو حکام کے مطابق ابتدائی طور پر شارٹ سرکٹ کا امکان ظاہر کیا گیا تھا، تاہم پولیس نے واقعے کو مشکوک قرار دیتے ہوئے مبینہ طور پر آگ لگائے جانے اور قتل کے شبہے میں فرانزک شواہد اکٹھے کر کے باقاعدہ تفتیش شروع کر دی ہے۔