پی ٹی آئی پارلیمانی پارٹی حکومت سے مذاکرات کی حامی، طریقہ کار پر رہنما تقسیم

پاکستان تحریک انصاف (پی ٹی آئی) کی پارلیمانی پارٹی کے اجلاس میں حکومت کے ساتھ مذاکرات کرنے کی اصولی حمایت تو کر دی گئی ہے، تاہم مذاکرات کے طریقہ کار اور لائحہ عمل کے معاملے پر پارٹی رہنما دو مختلف حصوں میں تقسیم نظر آتے ہیں۔

باخبر ذرائع کے مطابق چیئرمین پی ٹی آئی بیرسٹر گوہر علی خان اور ان کے ہم خیال رہنما، محمود خان اچکزئی اور علامہ راجہ ناصر عباس کے ذریعے ہی حکومت سے مذاکرات کرنے پر بضد ہیں، جب کہ پارلیمانی پارٹی کے کئی اراکین نے اس مؤقف سے اختلاف کرتے ہوئے پی ٹی آئی کی اپنی باضابطہ مذاکراتی کمیٹی تشکیل دینے کا پرزور مطالبہ کیا ہے۔ اجلاس کے دوران پی ٹی آئی اراکین نے موجودہ اپوزیشن لیڈرز کے سیاسی کردار پر بھی کھل کر تنقید کی اور خدشہ ظاہر کیا کہ اگر دیگر اپوزیشن لیڈرز نے مذاکرات میں حصہ لیا تو وہ اپنے ذاتی یا دیگر سیاسی مطالبات آگے رکھیں گے، جس کی وجہ سے پی ٹی آئی کے اصل مطالبات پس منظر میں چلے جائیں گے۔

پارلیمانی اراکین کا اصرار ہے کہ پارٹی کی اپنی ایک باضابطہ مذاکراتی کمیٹی بنائی جائے جو براہ راست حکومت سے بات چیت کرے۔ اراکین کی تجاویز کے مطابق اس مجوزہ کمیٹی میں محمود خان اچکزئی اور راجہ ناصر عباس کو بطورِ مشیر یا رکن شامل تو کیا جا سکتا ہے، تاہم مذاکرات کی حتمی حسیات اور اختیار ان سے واپس لے لیا جائے۔ اراکین کا کہنا ہے کہ یہ کمیٹی بانی پی ٹی آئی کی رہائی اور ریلیف کے حصول کے لیے تمام تر کوششیں کرے گی، اور اس مقصد کے لیے حکومت کے ساتھ “کچھ لو اور کچھ دو” (Give and Take) کی عملی پالیسی اختیار کی جانی چاہیے