کویت کا بجٹ خسارہ 23 ارب ڈالر تک پہنچ گیا، تیل کی آمدنی میں 11.2 فیصد کمی

خلیجی ملک کویت کا بجٹ خسارہ 23 ارب ڈالر تک پہنچ گیا ہے، جبکہ اس کی تیل کی آمدنی میں 11.2 فیصد کی نمایاں کمی ریکارڈ کی گئی ہے۔ کویت کی وزارتِ خزانہ کی جانب سے جاری کردہ اعداد و شمار کے مطابق، مالی سال 2025-26 میں ملک کا مجموعی بجٹ خسارہ بڑھ کر 7.1 ارب کویتی دینار (23 ارب امریکی ڈالر) ہو گیا ہے، جو گزشتہ مالی سال کے مقابلے میں 13.2 فیصد زیادہ ہے۔ رپورٹ میں بتایا گیا ہے کہ عالمی مارکیٹ کی صورتحال کے باعث کویت کی مجموعی آمدنی ابتدائی تخمینے سے 10 فیصد کم رہی، جس میں تیل کی آمدنی 11.2 فیصد کی گراوٹ کے بعد 15.3 ارب کویتی دینار (تقریباً 49 ارب ڈالر سے زائد) ریکارڈ کی گئی ہے۔ تیل کی قیمتوں اور پیداوار میں اتار چڑھاؤ کو بجٹ خسارے میں اس بڑے اضافے کی بنیادی وجہ قرار دیا جا رہا ہے۔