’بیٹھے رہنے سے کینسر کا خطرہ بڑھ جاتا ہے‘

اگر آپ کا کام ایسا ہے جس میں آپ کو گھنٹوں ایک ہی جگہ بیٹھنا پڑتا ہے، تو اب محتاط ہو جائیے۔ معروف طبی جریدے “PLOS میڈیسن” میں شائع ہونے والی ایک نئی تحقیق کے مطابق، دن بھر میں بلاتعطل بیٹھنے کا ہر ایک اضافی گھنٹہ کینسر سے مرنے کے خطرے کو 9 فیصد تک بڑھا سکتا ہے۔

یونیورسٹی آف گلاسگو کے ماہرِ صحت فریڈرک ہو اور ان کے ساتھیوں کی جانب سے کی جانے والی اس تحقیق میں بتایا گیا ہے کہ جاگتے ہوئے زیادہ دیر تک بیٹھنا، ٹیک لگانا یا لیٹے رہنا مجموعی صحت کے لیے انتہائی نقصان دہ ثابت ہو سکتا ہے۔ اس تحقیق کے لیے ‘یو کے بائیو بینک’ کے 91 ہزار 292 شرکاء کے ڈیٹا کا جائزہ لیا گیا، جنہوں نے سات دن تک اپنی جسمانی سرگرمیوں کو نوٹ کرنے والا مانیٹر پہنا اور بعد میں 12 سال سے زائد عرصے تک ان کی صحت پر نظر رکھی گئی۔

تحقیق سے معلوم ہوا کہ طویل عرصے تک مسلسل بیٹھے رہنے کا تعلق کینسر کی شرح میں اضافے اور خاص طور پر موٹاپے و ٹائپ 2 ذیابیطس سے جڑے کینسرز سے ہے۔ ان میں غذائی نالی، جگر، گردے، لبلبے، بڑی آنت (کولوریکٹل)، چھاتی اور تھائیرائیڈ کا کینسر شامل ہیں۔

تاہم، تحقیق میں ایک مثبت پہلو بھی سامنے آیا ہے کہ اگر بیٹھنے کے وقت کو کم کر دیا جائے تو کینسر کا خطرہ نمایاں حد تک کم ہو جاتا ہے۔ اگر کوئی شخص روزانہ اپنے طویل بیٹھنے کے وقت میں سے صرف ایک گھنٹہ کم کر کے ہلکی پھلکی جسمانی سرگرمی یا پیدل چلنے کو معمول بنا لے، تو کینسر سے موت کا خطرہ 12 فیصد تک کم ہو سکتا ہے۔

محققین نے یہ واضح بھی کیا ہے کہ چونکہ اس مطالعے میں شامل یو کے بائیو بینک کے رضاکار عام آبادی کے مقابلے میں پہلے ہی زیادہ صحت مند اور متحرک تھے، اس لیے اس کے نتائج کا اطلاق سو فیصد ہر آبادی پر نہیں کیا جا سکتا۔ علاوہ ازیں، اس بات کا ڈیٹا بھی موجود نہیں تھا کہ یہ بیٹھنا دفتر میں کام کے دوران تھا یا سفر کے وقت، تاہم ماہرین کا مشورہ ہے کہ ہر تھوڑی دیر بعد نشست سے اٹھنا صحت کے لیے ناگزیر ہے۔