پاکستان سمیت دنیا بھر میں ہڈیوں کے امراض کا عالمی دن آج منایا جا رہا ہے

پاکستان سمیت دنیا بھر میں آج ورلڈ آسٹیوپوروسس ڈے (ہڈیوں کی کمزوری کا عالمی دن) منایا جا رہا ہے، جس کا بنیادی مقصد ہڈیوں کو خاموشی سے کھوکھلا کرنے والی اس موذی بیماری کے بارے میں عام لوگوں میں آگاہی پیدا کرنا ہے۔

آسٹیوپوروسس کو ‘خاموش بیماری’ اس لیے کہا جاتا ہے کیونکہ یہ کسی ظاہری علامت کے بغیر ہڈیوں کو اندر سے شدید کمزور کر دیتی ہے، جس کے نتیجے میں معمولی چوٹ یا گرنے سے بھی شدید فریکچر ہو جاتا ہے۔ انٹرنیشنل آسٹیوپوروسس فاؤنڈیشن اور مقامی طبی تحقیق کے مطابق پاکستان میں اس وقت لاکھوں افراد اس بیماری میں مبتلا ہیں، جن میں 72 لاکھ خواتین بھی شامل ہیں۔ خدشہ ظاہر کیا گیا ہے کہ سنہ 2050 تک یہ تعداد بڑھ کر 1 کروڑ 29 لاکھ تک پہنچ جائے گی، جبکہ اکیلے صوبہ پنجاب میں 50 لاکھ سے زائد افراد اس کا شکار ہیں۔

طبی ماہرین کا کہنا ہے کہ خواتین میں اس بیماری کا رجحان مردوں کی نسبت تین گنا زیادہ ہے اور 50 سال سے زائد عمر کی 30 فیصد پاکستانی خواتین آسٹیوپوروسس میں مبتلا ہیں۔ ماہرین کے مطابق کم عمری کی شادی، بار بار حمل، دودھ پلانے کے دوران کیلشیم کا عدم استعمال اور وٹامن ڈی کی شدید کمی اس کی اہم وجوہات ہیں۔ آرتھوپیڈک سرجن پروفیسر سجاد احمد گورایہ کا کہنا ہے کہ لاہور میں 36 فیصد افراد آسٹیوپوروسس کا شکار ہیں، تاہم متوازن غذا، وٹامن ڈی اور روزمرہ ورزش کے ذریعے اس بیماری سے بچاؤ اور صحت مند زندگی کا حصول ممکن ہے۔