کراچی میں معروف برانڈز کی 5 جعلی ادویات پکڑی گئیں، ڈریپ کا الرٹ جاری

ڈرگ ریگولیٹری اتھارٹی آف پاکستان (ڈریپ) نے کراچی میں جعلی اور غیر معیاری ادویات کے خلاف کریک ڈاؤن کے دوران معروف قومی و ملٹی نیشنل کمپنیوں کے نام پر تیار کردہ ادویات کے 5 بیچز کو جعلی قرار دیتے ہوئے ریپڈ الرٹس جاری کر دیے ہیں۔ ڈرگ ٹیسٹنگ لیبارٹری کراچی کے مطابق معدے کے سیرپ ’میوکین‘، انفیکشنز کی اینٹی بائیوٹک ’آگمنٹین‘ اور ’ویلوسیف‘ کیپسول کے علاوہ اینٹی الرجک اسپرے ’نیزومٹ‘ اور پٹھوں کی سوزش کی دوا ’نوسپا فورٹ‘ کے جعلی بیچز کی مارکیٹ میں سپلائی ثابت ہوئی ہے، جن کے لیبارٹری نمونوں میں اصل خام مال سرے سے موجود ہی نہیں تھا۔ ڈریپ نے خبردار کیا ہے کہ ان غیر قانونی ادویات کا استعمال شہریوں کے لیے جان لیوا ثابت ہو سکتا ہے، اور اس ضمن میں تمام صوبائی ڈرگ حکام کو مارکیٹ سے ان متعلقہ بیچز کو فوری طور پر ضبط کرنے کی ہدایات جاری کر دی گئی ہیں۔