نیویارک میں سینٹرل پارک کی تاریخی بگھیوں پر پابندی کا بل منظور، 2028 میں صنعت کا خاتمہ ہوگا

نیویارک سٹی کونسل نے سینٹرل پارک کی تاریخی پہچان سمجھی جانے والی بگھیوں (تانگوں) پر مکمل پابندی کا بل کثرتِ رائے سے منظور کر لیا ہے، جس کے تحت سال 2028ء تک اس صنعت کا مکمل خاتمہ کر دیا جائے گا۔

کونسل میں ‘رومانچزلاء’ (Romanch’s Law) نامی اس بل کے حق میں 40 جبکہ مخالفت میں صرف 7 ووٹ آئے، جبکہ 2 اراکین نے ووٹنگ میں حصہ نہیں لیا۔ یہ قانون ایک سیاح ‘رومانچ مہاجن’ کے نام سے منسوب ہے جو بے قابو گھوڑے کی زد میں آ کر جاں بحق ہو گیا تھا۔ اب یہ بل حتمی منظوری کے لیے نیویارک کے میئر زہران ممدانی کو بھیجا جائے گا، جو اس سے قبل ہی قانون کی حمایت کا اشارہ دے چکے ہیں۔

سینٹرل پارک کنزروینسی کی سی ای او بیٹسی اسمتھ اور جانوروں کے حقوق کی تنظیمیوں نے اس فیصلے کا خیرمقدم کرتے ہوئے کہا کہ جدید دور میں مصروف سڑکوں پر بگھیاں سیاحوں اور خود گھوڑوں کے لیے شدید خطرہ بن چکی تھیں۔ دوسری جانب ٹرانسپورٹ ورکرز یونین (TWU) کے نمائندوں اور بگھی ڈرائیوروں نے اس فیصلہ پر شدید احتجاج کرتے ہوئے اسے عدالت میں چیلنج کرنے کا اعلان کیا ہے۔ اس کے علاوہ امریکی صدر ڈونلڈ ٹرمپ نے سوشل میڈیا سائٹ ‘ٹروتھ سوشل’ پر اپنے ایک بیان میں اس تاریخی روایت کے خاتمے پر افسوس کا اظہار کیا ہے۔