نیویارک انتخابات: ووٹر رجسٹریشن کی آخری تاریخ 24 اکتوبر، All About USA کی جانب سے رہنما ووٹر گائیڈ جاری

نیویارک میں 3 نومبر 2026ء کے مڈٹرم انتخابات کے لیے ووٹر رجسٹریشن کی آخری تاریخ 24 اکتوبر مقرر کی گئی ہے، جبکہ اسی روز سے ارلی ووٹنگ (Early Voting) کا آغاز بھی ہو رہا ہے جو یکم نومبر تک جاری رہے گا۔ اس سلسلے میں پاکستانی امریکی کمیونٹی سمیت تمام شہریوں کو انتخابی اور شہری نظام سے جوڑنے کے لیے غیر منافع بخش تنظیم All About USA نے “Lets Vote NYC” کے نام سے ایک جامع آن لائن ووٹر گائیڈ متعارف کرائی ہے۔

تنظیم کے مطابق اس اقدام کا بنیادی مقصد شہریوں کو ووٹر رجسٹریشن، پولنگ مقامات، اہم تاریخوں اور ووٹر حقوق سے متعلق معلومات ایک ہی جگہ فراہم کرنا ہے تاکہ عوام باخبر انداز میں جمہوری عمل کا حصہ بن سکیں۔ یہ ووٹر آگاہی پروگرام مکمل طور پر غیر جانبدارانہ ہے اور کسی سیاسی جماعت یا امیدوار کی حمایت نہیں کرتا۔ All About USA کے شہری آگاہی پروگرام کا دائرہ کار صرف انتخابات تک محدود نہیں بلکہ اس کے ذریعے شہریوں کو سٹی کونسل، ریاستی و وفاقی حکومت کے اختیارات، عوامی سہولیات اور قانونی حقوق سے مستفید ہونے کے طریقوں کے بارے میں بھی آگاہ کیا جا رہا ہے۔

تنظیم نے میڈیا اداروں اور سماجی کارکنوں سے اپیل کی ہے کہ وہ اس آن لائن ووٹر گائیڈ کو زیادہ سے زیادہ لوگوں تک پہنچائیں تاکہ تمام اہل ووٹرز رجسٹریشن کی آخری تاریخ سے قبل اپنے اندراج کو یقینی بنا سکیں۔