کراچی میں پولیو کا نیا کیس رپورٹ، ملک بھر میں رواں سال متاثرین کی تعداد 7 ہوگئی

سندھ ایمرجنسی آپریشن سینٹر (ای او سی) کے مطابق کراچی کے ضلع شرقی سے پولیو کا نیا کیس رپورٹ ہوا ہے، جس کے بعد ملک بھر میں سال 2026 کے دوران سامنے آنے والے پولیو کیسز کی مجموعی تعداد 7 ہو گئی ہے۔ ای او سی کے مطابق رواں سال کے 7 کیسز میں سے 5 خیبر پختونخوا اور 2 سندھ سے رپورٹ ہوئے ہیں، جبکہ کراچی میں پولیو کا اس سے قبل آخری کیس دسمبر 2024 میں سامنے آیا تھا۔ سندھ ای او سی نے والدین سے اپیل کی ہے کہ وہ بچوں کو پولیو جیسے لاعلاج مرض سے بچانے کے لیے قطرے لازمی پلوائیں۔ حکام کے مطابق 2 سے 8 نومبر 2026 تک منعقد ہونے والی قومی انسدادِ پولیو مہم کے دوران ملک کے 97 اضلاع میں 2 کروڑ 39 لاکھ سے زائد بچوں کو قطرے پلانے کا ہدف مقرر کیا گیا ہے۔