کینیڈا اور ترکیہ میں دوطرفہ تعلقات کو سٹریٹجک شراکت داری میں تبدیل کرنے کا معاہدہ طے

کینیڈا اور ترکیہ نے اپنے دوطرفہ تعلقات کو باضابطہ طور پر اسٹریٹجک شراکت داری میں تبدیل کرنے کا معاہدہ کر لیا ہے، جس کا بنیادی مقصد تجارت، دفاع، توانائی اور سرمایہ کاری سمیت اہم شعبوں میں باہمی تعاون کو فروغ دینا ہے۔

کینیڈین وزیراعظم مارک کارنے کے ترکیہ کے پہلے دوطرفہ دورے کے موقع پر انقرہ میں صدر رجب طیب اردوان کے ساتھ اس اہم معاہدے پر اتفاق کیا گیا۔ اس کے ساتھ ہی دونوں ممالک کے درمیان ‘آزاد تجارتی معاہدے’ (Free Trade Agreement) کے باقاعدہ مذاکرات کا پہلا دور آئندہ ماہ شروع کرنے کا بھی اعلان کیا گیا۔

یہ سفارتی و معاشی پیشرفت ایسے وقت میں سامنے آئی ہے جب امریکی صدر ڈونلڈ ٹرمپ کی جانب سے بھاری محصولات (Tariffs) کی عائدگی کے خدشات اور کینیڈا کی خودمختاری کے حوالے سے بیانات کے بعد وزیراعظم مارک کارنے امریکہ پر معاشی انحصار کم کرنے اور دنیا بھر میں نئے تجارتی شراکت دار تلاش کرنے کی حکمتِ عملی پر عمل پیرا ہیں۔ طے پانے والے اس معاہدے کے تحت دونوں ممالک کے مابین دفاع، سلامتی، جوہری توانائی، اہم معدنیات اور مائع قدرتی گیس (LNG) سمیت دیگر اہم اقتصادی شعبوں میں تعاون بڑھایا جائے گا۔