امریکی صدر ٹرمپ نے جلد ہی ایران پر دوبارہ حملہ کرنے کا اشارہ دے دیا

امریکی صدر ڈونلڈ ٹرمپ نے وائٹ ہاؤس کے باہر صحافیوں سے گفتگو کرتے ہوئے اشارہ دیا ہے کہ امریکہ جلد ہی ایران کے خلاف مزید عسکری کارروائی کر سکتا ہے۔ صدر ٹرمپ کا کہنا تھا کہ ہم نے ایران کی عسکری صلاحیتوں کو شدید نقصان پہنچایا ہے اور ممکن ہے کہ بہت جلد مزید کارروائیاں بھی کی جائیں۔

امریکی مڈٹرم (وسط مدتی) انتخابات کے دوران ووٹرز پر جنگی اقدامات کے اثرات سے متعلق سوال کے جواب میں صدر ٹرمپ نے کہا کہ ووٹرز کا ایک طبقہ ان کے اقدامات کو پسند کر رہا ہے کیونکہ وہ وہ سخت فیصلے کر رہے ہیں جو سابق امریکی صدور کو کرنے چاہیے تھے۔ تاہم انہوں نے اعتراف کیا کہ جنگی پالیسیوں کی ایک بھاری قیمت چکانی پڑتی ہے لیکن امریکہ کسی صورت ایران کو ایٹمی ہتھیار حاصل کرنے کی اجازت نہیں دے سکتا۔ انہوں نے ایران کے ساتھ کسی بھی قسم کے مذاکرات کی تردید کرتے ہوئے الزام عائد کیا کہ تہران مڈٹرم انتخابات سے قبل تیل کی عالمی قیمتوں کو مصنوعی طور پر بڑھانے کے لیے آبنائے ہرمز میں کشیدگی کے جھوٹے ڈرامے رچا رہا ہے۔

دوسری جانب امریکی ذرائع ابلاغ کی رپورٹس کے مطابق امریکہ اور اسرائیل نے امریکی مڈٹرم انتخابات کے فوراً بعد ایران پر ایک نئے اور منظم حملے کا مشترکہ منصوبہ تیار کر لیا ہے۔ ان رپورٹس کے مطابق دونوں ممالک کی افواج نے ممکنہ اہداف کی مشقیں تیز کر دی ہیں، جن میں ایران کی توانائی کی تنصیبات، ایٹمی مراکزی عمارتیں، اور میزائل و ڈرون ذخائر شامل ہیں۔