سندھ میں رواں سال ڈینگی کا پہلا مریض دم توڑ گیا

سندھ میں ڈینگی وائرس نے رواں سال کی پہلی جان لے لی ہے۔ ترجمان محکمہ صحت کے مطابق کراچی کے علاقے پی آئی بی کالونی سے تعلق رکھنے والی 20 سالہ لڑکی دورانِ علاج دم توڑ گئی ہے۔ متاثرہ لڑکی کو 11 مارچ کو ہسپتال داخل کیا گیا تھا، تاہم وہ 16 مارچ کو جانبر نہ ہو سکی۔ رواں سال اب تک سندھ بھر میں ڈینگی کے 198 کیسز رپورٹ ہو چکے ہیں، جن میں سب سے زیادہ 163 کیسز کا تعلق کراچی ڈویژن سے ہے، جبکہ حیدرآباد سے 24، میرپور خاص سے 8 اور سکھر سے 3 کیسز سامنے آئے ہیں۔

دوسری جانب، صوبے میں ملیریا کی صورتحال بھی تشویشناک رخ اختیار کر رہی ہے۔ ترجمان صوبائی وزیر صحت کے مطابق جنوری سے 7 اپریل تک سندھ بھر میں ملیریا کے 20 ہزار 123 کیسز ریکارڈ کیے گئے ہیں۔ کراچی میں ملیریا کے 184 کیسز رپورٹ ہوئے، جن میں سب سے زیادہ ضلع جنوبی سے 88 کیسز شامل ہیں۔ حیدرآباد ڈویژن 7 ہزار 765 کیسز کے ساتھ سرفہرست ہے، جبکہ لاڑکانہ سے 5 ہزار 468 اور شہید بینظیر آباد سے 2 ہزار 544 کیسز رپورٹ ہوئے ہیں۔ طبی ماہرین نے شہریوں کو مچھروں سے بچاؤ کی تدابیر اختیار کرنے کی ہدایت کی ہے۔