پشاور میں بالی ووڈ کے لیجنڈری اداکار کی قدیم حویلی کو نقصان

پشاور: خیبر پختونخوا کے دارالحکومت پشاور کے تاریخی علاقے قصہ خوانی بازار میں واقع “کپور حویلی” کے حوالے سے تشویشناک خبر سامنے آئی ہے۔ مسلسل بارشوں اور اب سے کچھ دیر پہلے محسوس کیے جانے والے زلزلے کے جھٹکوں کے باعث حویلی کی ایک دیوار کا کچھ حصہ منہدم ہو گیا ہے۔ عینی شاہدین کے مطابق، عمارت کی دیوار گرنے سے قریبی گلی میں ملبہ جمع ہو گیا ہے، تاہم خوش قسمتی سے کوئی جانی نقصان نہیں ہوا۔

راج کپور کی یہ حویلی، جو بالی ووڈ کے کپور خاندان کی جڑوں کی علامت سمجھی جاتی ہے، حکومتِ پاکستان کی جانب سے قومی اثاثہ قرار دی جا چکی ہے۔ محکمہ آثارِ قدیمہ کی تحویل میں ہونے کے باوجود، مناسب دیکھ بھال اور بروقت مرمت نہ ہونے کے باعث عمارت کی حالت عرصہ دراز سے خستہ تھی، جسے حالیہ قدرتی آفات نے مزید نقصان پہنچایا ہے۔