ٹرمپ کا جنگ جاری رکھنے کا اعلان، خام تیل کی قیمتوں میں مزید اضافہ

نیویارک/ٹوکیو: امریکی صدر ڈونلڈ ٹرمپ کی جانب سے ایران کے خلاف فوجی آپریشن جاری رکھنے اور آئندہ دو سے تین ہفتوں میں “پتھر کے دور” میں دھکیلنے والی کارروائیوں کے اعلان نے عالمی توانائی مارکیٹ کو لرزا دیا ہے۔ ٹرمپ کے خطاب کے فوراً بعد عالمی منڈی میں خام تیل کی قیمتوں میں 3 سے 4 فیصد تک کا اچانک اضافہ دیکھا گیا ہے۔

برطانوی معیار کا خام تیل برینٹ (Brent) تقریباً 4 فیصد اضافے کے بعد 105.55 ڈالر فی بیرل کی سطح پر پہنچ گیا ہے، جو کہ ایک طویل عرصے بعد اتنی بلند ترین سطح ہے۔ اسی طرح امریکی خام تیل ویسٹ ٹیکساس انٹرمیڈیٹ (WTI) بھی 3 فیصد اضافے کے ساتھ 103 ڈالر فی بیرل پر ٹریڈ کر رہا ہے۔ ماہرینِ معیشت کا کہنا ہے کہ آبنائے ہرمز (Strait of Hormuz) کی ممکنہ بندش اور ایران کی تیل کی تنصیبات کو نشانہ بنائے جانے کے خدشات نے سرمایہ کاروں کو شدید محتاط کر دیا ہے۔

دوسری جانب، صدر ٹرمپ کے جارحانہ بیان کے اثرات ایشیائی حصص بازاروں (Stock Markets) پر بھی نمایاں رہے۔ ٹوکیو سے لے کر ہانگ کانگ تک، بڑے بڑے انڈیکس “منہ کے بل” گر پڑے ہیں۔ سرمایہ کاروں کی جانب سے حصص کی فروخت کے باعث مارکیٹ میں غیر یقینی صورتحال پیدا ہو گئی ہے، جس سے عالمی سطح پر مہنگائی کے ایک نئے طوفان کا خدشہ ظاہر کیا جا رہا ہے۔