سٹاک مارکیٹ میں بڑی مندی کے بعد بہتری، کاروبار کا مثبت رجحان رہا

کراچی: پاکستان سٹاک مارکیٹ میں کاروباری ہفتے کے دوسرے روز زبردست تیزی ریکارڈ کی گئی، جس کے نتیجے میں ہنڈرڈ انڈیکس مثبت زون میں بند ہوا۔ گزشتہ روز کی 4864 پوائنٹس کی بڑی مندی کے بعد آج مارکیٹ کے آغاز سے ہی سرمایہ کاروں نے خریداری میں گہری دلچسپی ظاہر کی، جس سے انڈیکس ایک موقع پر 3105 پوائنٹس کے اضافے کے ساتھ 1 لاکھ 50 ہزار 144 کی بلند ترین سطح پر پہنچ گیا۔

تاہم، دن کے اختتام پر پرافٹ ٹیکنگ کے باعث انڈیکس میں کچھ کمی آئی اور ہنڈرڈ انڈیکس مجموعی طور پر 1900 پوائنٹس اضافے کے ساتھ 1 لاکھ 48 ہزار 743 کی سطح پر بند ہوا۔ آج مارکیٹ میں تجارتی سرگرمیاں بھی عروج پر رہیں اور مجموعی طور پر 19 ارب 56 کروڑ روپے سے زائد مالیت کے 23 کروڑ 27 لاکھ سے زائد شیئرز کا لین دین ہوا۔

تجزیہ کاروں کا کہنا ہے کہ انڈیکس کا ڈیڑھ لاکھ کی سطح کو چھونا مارکیٹ کے مضبوط بنیادوں پر ہونے کی علامت ہے، اور گزشتہ روز کی گراوٹ کے بعد آج کی ریکوری نے سرمایہ کاروں کے خدشات کو کافی حد تک دور کر دیا ہے۔