صرافہ مارکیٹ میں سونے کا بڑا دھماکہ: فی تولہ سونا 2800 روپے مہنگا، قیمت 4 لاکھ 78 ہزار سے تجاوز

کراچی: عالمی مارکیٹ میں سونے کی قیمتوں میں غیر معمولی اضافے کے باعث پاکستان میں بھی سونے اور چاندی کے نرخوں میں نمایاں تیزی ریکارڈ کی گئی ہے۔ صرافہ مارکیٹ کے مطابق، فی تولہ سونے کی قیمت 2800 روپے کے اضافے کے بعد 4 لاکھ 78 ہزار 762 روپے کی بلند ترین سطح پر پہنچ گئی ہے۔

اسی طرح، 10 گرام سونے کی قیمت میں 2401 روپے کا اضافہ دیکھا گیا ہے، جس کے بعد اس کے نرخ 4 لاکھ 10 ہزار 461 روپے ہو گئے ہیں۔ عالمی مارکیٹ میں فی اونس سونے کی قیمت 28 ڈالر کے اضافے سے 4560 ڈالر ریکارڈ کی گئی ہے، جس کا براہِ راست اثر مقامی قیمتوں پر مرتب ہوا ہے۔

سونے کے ساتھ ساتھ چاندی کی قیمتوں کو بھی پر لگ گئے ہیں۔ ملک میں فی تولہ چاندی کی قیمت میں 260 روپے کا اضافہ ہوا ہے، جس کے بعد چاندی 7784 روپے فی تولہ کی سطح پر آگئی ہے۔ ماہرینِ معیشت کا کہنا ہے کہ عالمی سیاسی و معاشی عدم استحکام اور سرمایہ کاروں کی جانب سے سونے کو ‘محفوظ سرمایہ کاری’ تصور کرنے کی وجہ سے قیمتوں میں مسلسل اضافہ دیکھا جا رہا ہے۔