ترک انفلوئنسر کی خودکشی، مشہور شخصیات کی ذہنی صحت پر سوالات اٹھنے لگے

استنبول: ترکی کی ہردلعزیز سوشل میڈیا انفلوئنسر، 21 سالہ کبریٰ کارااصلان کے اچانک انتقال نے ان کے لاکھوں مداحوں کو ہلا کر رکھ دیا ہے۔ عینی شاہدین کے مطابق، کبریٰ کو گیبزے کے مقام پر عثمان غازی پل کی ریلنگ پر چڑھتے دیکھا گیا، جہاں وہاں سے گزرنے والے ڈرائیورز اور راہگیروں نے انہیں روکنے کی بھرپور کوشش کی، مگر وہ تمام تر التجاؤں کے باوجود موت کی آغوش میں کود گئیں۔

سوشل میڈیا پر وائرل ہونے والی دلخراش ویڈیوز میں دیکھا جا سکتا ہے کہ لوگ انہیں سمجھانے کی کوشش کر رہے تھے، لیکن انہوں نے بالآخر پل سے نیچے پانی میں چھلانگ لگا دی۔ ریسکیو اہلکاروں نے انہیں بے ہوشی کی حالت میں پانی سے نکال کر ہسپتال منتقل کیا، تاہم وہ جانبر نہ ہو سکیں۔ کبریٰ اپنی ‘لائف اسٹائل’ ویڈیوز اور ایک ترک فٹبال کلب سے والہانہ لگاؤ کی وجہ سے نوجوانوں میں بے حد مقبول تھیں۔

اس واقعے نے ایک بار پھر سوشل میڈیا کی دنیا کے تاریک پہلوؤں اور انفلوئنسرز کی ذہنی صحت پر سوالات اٹھا دیے ہیں۔ مداح اور سماجی ماہرین حیرت زدہ ہیں کہ شہرت کی بلندیوں پر موجود نوجوان ستارے کیوں اس قدر شدید ذہنی دباؤ کا شکار ہو رہے ہیں کہ اپنی زندگی کا خاتمہ کرنے پر مجبور ہو جاتے ہیں۔ انٹرنیٹ پر اس وقت ‘ذہنی صحت کی اہمیت’ اور ‘تنہائی’ جیسے موضوعات پر ایک بڑی بحث جاری ہے۔