ایف آئی اے ہیڈ کوارٹر میں بڑی ڈاؤن سائزنگ: ایگزیکٹو سٹاف میں 50 فیصد کمی کا فیصلہ

اسلام آباد: فیڈرل انویسٹی گیشن ایجنسی (FIA) کے ڈائریکٹر جنرل کی ہدایت پر ہیڈ کوارٹر کی افرادی قوت کو کم کرنے کے لیے ایک بڑا انتظامی فیصلہ کیا گیا ہے۔ نئے نوٹیفیکیشن کے مطابق، ایف آئی اے ہیڈ کوارٹر کے ایگزیکٹو سٹاف میں 50 فیصد تک کمی کی جائے گی اور فارغ ہونے والے عملے کو فیلڈ یونٹس میں تعینات کیا جائے گا تاکہ وہاں جاری تحقیقات اور آپریشنز میں تیزی لائی جا سکے۔

ذرائع کے مطابق، ہیڈ کوارٹر سے نکالے جانے والے 211 افسران و اہلکاروں کی فہرست مکمل کر لی گئی ہے۔ اس ڈاؤن سائزنگ کا مقصد فیلڈ میں سٹاف کی کمی کو دور کرنا اور افرادی قوت کا موثر استعمال یقینی بنانا ہے۔ ان افسران میں ڈپٹی ڈائریکٹرز، اسسٹنٹ ڈائریکٹرز، انسپکٹرز، سب انسپکٹرز اور ہیڈ کانسٹیبل رینک کے اہلکار شامل ہیں۔

ڈی جی ایف آئی اے نے ان احکامات پر فوری عمل درآمد کی ہدایت جاری کر دی ہے، جس کے نتیجے میں ایجنسی کے اہم عہدوں پر بڑے پیمانے پر ردوبدل متوقع ہے۔ ماہرین کا کہنا ہے کہ اس اقدام سے فیلڈ انکوائریوں اور انسانی اسمگلنگ، سائبر کرائم اور مالیاتی فراڈ جیسے کیسز کی کارروائیوں میں بہتری آئے گی کیونکہ زیادہ تر تجربہ کار افسران اب براہِ راست آپریشنل ڈیوٹیز سرانجام دیں گے۔